(MA 3)براہوئی افسانہ نگاری

براہوئی افسانہ نا اگہ پنجاہ سال نا ہیت ئے کین تو دا زمانی لحاظ ٹی 1955 آن 2005 اسکان نا دور پاننگک یعنی دا پنجاہ سال ٹی براہوئی افسانہ تون انت مسونے؟ دا تینا سفر ٹی انت بنگونے او انت خنانے؟ اخس مونی انانے اخس پدی، ہرا ہرا سرحال آتیا نوشتہ مسونے ؟ اخس تینا راجی ضرورت آتا پورہ واری ئے کرینے؟ دا فکری بابت اخس شون الکونے او فنی بابت تینا گرج آتے اخس پورو کرینے یا داکہ تینا عہد نا افسانہ غاتیان اخس خڑک مسونے دا کل امو ہیت آکو ہرافتے دا لیکچرر ٹی سمجنگ نا کوشست کینہ۔

اول دا ہیت کہ براہوئی نا اولیکا افسانہ "مسافر" نوزدہ صد و پنجاہ و پنچ ٹی چھاپ مسونے  پاننگ مریک کہ افسانہ، براہوئی ٹی افسانہ تینا اولیکا قدم ئے انداکان تخا ہرا پدان،  مدان مدان سفر کرسہ 2005 اسکان دا تینا شکل و شباہت، رنگ و دروشم، قد و ہاٹی ٹی انت بدلی ایسونے یا اتنے دا پاننگ قبل از وختے داخاتران کہ براہوئی ٹی اینو اسکان دھنو تنقیدی و نوشت اس مونا بتنے ہراڑان براہوئی ادب نا بابت کونسیپٹ کلیئر مننگ کے نہ دا بابت دھنو خاصو تحقیق اس مونا بسونے ہراڑان صنف آتا بابت جوانو معلومداری اس دوئی مننگ کے جوانو دروشم اس مونا بننگے ہراڑان براہوئی ادب او اونا صنف آتے اونا ہقی دورشم ٹی سرپند مننگ مرے ۔

ہاں دا ردٹ ضرورت نوشتہ کننگانے، پٹ و پول مسونے، ریسرچ آرٹیکل نوشتہ مسونے ولے دافتیٹی اچو سوال اسینا ورندی رسینگپک۔ مننگ کیک ڈاکٹر منظور بلوچ نا پی ایچ ڈی مقالہ ٹی براہوئی افسانہ نا بابت بھلو معلومداری اس مرو ولے دا داسکان کتابی دروشم ٹی مونا بتنے داکان بیدس اخس کہ نوشتہ مسونے او باز شیفکو سطح نا نوشت اریر داڑسکان کہ براہوئی افسانہ نا بابت ہرا تحقیق کننگانے اوفک بیرہ سات تیری اریر ہرافک پیسہ گریڈ او ذاتی شونداری کن نوشتہ مسونو ہرافتے خواننگ نہ بیرہ وخت نا بربادی ئے بلکہ دافتے خواننگ آن گڑاتے سرپند مننگ نا جاگہ غا پین وئیل ودی مریک دھنکہ خواجہ خدائیداد گل نا ایم فل مقالہ ٹی اچ سماہ تمپک کہ محقق انت پاننگ خواہک، ہیتس کیک ولدا اوڑان نمن مریک، دعوی اس کرینے ولدا تینٹ اونا نفی ئے کرینے، جاگس انت پاہک جاگس انت، وارس براہوئی افسانہ ئے دیک عالمی ادب تون گنڈک، وارس پاہک دا داسکان تینا بنائی شکل ٹی ئے انت پاننگ کہ محقق مطالعہ نا کمی نا سوب آن گڑاتے جوانی ٹی کہہ کننگ کتنے اونا ریسرچ تھیسز ٹی کلان بھلا مخنگ نا ہیت داکہ

" براہوئی ادب میں اگرچہ افسانہ کے آغآز کو بہت زیادہ عرصہ نہیں گزرا لیکن اس سے انکار ممکن نہیں کہ اس مختصر مدت میں براہوئی افسانے نے اتنی تیزی سے ارتقائی منازل طے کیں ہیں کہ آج اسے نہایت فخر کے ساتھ ترقی یافتہ ادب کے مقابل رکھ سکتے ہیں"

دا ہیت داخاتران ہم مخنگ کڑزک کہ پٹ و پول ٹی ہر ہیت ئے کننگ آن مست سد وار سوچوئی تمک ولدا اندا ہیت ئے ثابت کننگ کن چندی مثال آتے تروئی تمک  ہرادے تحقیق نا زبان ٹی حوالہ یا ریفرنس پاننگک داٹی بیدس حوالہ یا ثبوت آن اسل یقین کننگ مفک اندا خاتران دادے تحقیق پاننگ کہ داٹی ہر ہیت اگہ حقیقت مفک تو حقیقت آن باز خڑک مریک ولے داڑے تو محقق اندونو بھلو دعوی کرینے ولے دافتے کن اسہ مثالس ہم تننگ نا ضرورت محسوس کتنے کہ براہوئی نا دا افسانہ دنیا نا داخس زبان تیٹی ترجمہ مس او داخس خواننگا، دانا زیہا داخس مضمون نوشتہ مسونے مہالو پاریٹ براہوئی افسانہ نا بابت انتس کہ نوشتہ مسونے او بیرہ مخنگ آن سواہ پین اچس افس۔

براہوئی افسانہ نا بابت اینو اخس کہ نوشت دو بریک اوفک سفت و ثناہ غان شروع مریرہ او انداڑے ایسر مریرہ اندا سوب ئے کہ داسکان براہوئی افسانہ نا بابت ہچو ہیتس پک اف گڑا داپ اننگ مشکل ئے کہ دا تینا ارتقائی سفر ٹی انت انت خنانے؟ بس ولدا ہم دا کلاس ٹی گڑاس خوانوئی تو ارے گڑا تینٹ براہوئی افسانہ ئے خوانوئی او سمجوئی مریک ولدا دا بابت پاننگ مریک کہ براہوئی افسانہ اخس شون الکونے اخس مونی انانے، ہرا ہرا سرحال آتیا نوشتہ مسونے؟ فنی ردٹ اخس سوگو ارے؟ افسانہ نا ٹائٹل تون انتس کہ نوشتہ مسونے آیا دا کل افسانہ اریر ہم یا نہ؟ ہراڑسکان ای اسہ ادب نا طالب علم اسینا حیثیت اٹ براہوئی افسانہ ئے خوانانٹ  تو اوٹی دھنو حال اس اف ہرادے خواننگے او سمجنگے معلوم اندن مریک کہ دا وخت اسکان نوشتہ مروکا افسانہ غاتیٹی گڑاس دو برو ہرافتیان دا کلاس نا پھڈ پر مننگ کیک، انتئے کہ بازی آن نوشت آک افسانہ افس بیرہ اوفتے افسانہ نا ٹائٹل تننگانے دنکہ خدائیدادگل تینا مقالہ ٹی نوشتہ کیک

"براہوئی ادب میں افسانے کا آغاز پچاس کی دہائی میں ہوتا ہے۔ چونکہ براہوئی ادب میں افسانے کا ابتدائی زمانہ تھا اس لئے اس ابتدائی زمانے میں روایتی قصہ کہانیوں کو افسانے کے صنف میں شامل کرنے کی کوشش کی گئی ان افسانوں پر افسانے کے فنی تقاضوں یعنی تیکنیک کو افسانہ نگاروں نے شعوری یا لاشعوری طور پر ضروری نہیں سمجھا اور روایتی واقعات کا سہارا لے کر افسانہ لکھنے کی کوشش کی گئی"

دا ہوالہ غان دا ہیت جوانی ٹی مونا بننگ کیک کہ براہوئی ٹی انتس کہ افسانہ ناپنٹ نوشتہ مسونے اوفک کل افسانہ نا معیار آ پورا بفسہ محقق دا گڑانا تو نشاندہی ئے کرینے ولے دا پاننگ آن گریز کرینے کہ دافتیٹی ہرا ہرا نوشت آک افسانہ پاننگ مریرہ او ہرافک پاننگ مفسہ اندا خاتران داڑے کلاس ٹی افسانہ غاتے سرپند مننگ کہ چندی وئیل آک مونا بریرہ ہرافتے بیرہ اسہ جوانو او تحقیق اس ایسر کننگ کیک۔

زمانی لحاظ اٹ دا عہد نا افسانہ نگارآتیٹی ڈاکٹر تاج رئیسانی، اٖفضل مراد، عارف ضیاہ، وحید زہیر، طاہرہ احساس جتک و پین پین آستا پنک بریرہ ہرافتا افسانہ غاتے مونا تخسا براہوئی افسانہ نا اندا پنجاہ سال نا بابت ہیت مننگ کیک۔