براہوئی پوسکنا شاعری سرہال نا رد اٹ

ادب ٹی، کل آن زیات مشکل و چیڑگن آ سرحال ’’براہوئی پوسکنا شاعری نا بناء‘‘ نا تعین کننگ نائِ۔ انتئے کہ دا وخت اسکان اخس کہ پٹ و پول کروکو مسونو، ہراسٹ نا جتا جتا نظریہ و خیال آک دا سرحال آ ملیرہ۔ دا وخت اسکان پک  او، ولدی ئس مونی بتنے واہم دا سرحال آ گپ و تران کروکا تا خیال آتیٹی، اسہ گڑاس مشترکہ ئِ کہ بازآک دا گڑاغا امنا کیرہ کہ براہوئی پوسکنا شاعری یا ادب نا بناء، 1947ء آن مریک، ولے 1947ء آن تا 1960ء اسکان دا ہمو دور ئِ ہراٹی براہوئی پوسکنا ادب نا بناء مننگ کیک یا دا سوج نا ورندی ڈھکوکے۔

اولیکوار ڈاکٹر عبدالرحمٰن براہوئی داخیال نا درشانی ئِ، براہوئی، نوشتئی ادب نا بشخ آتیٹی داوڑ کرے۔

’’ہراتم نن براہوئی نوشتئی آ ادب ئِ ہرینہ تو نن اودے چار جاگہ بشخ کینہ

اولیکو بشخ۔۔۔۔ 1666، خان آتا دوران مست نا ادب‘

ارٹمیکو بشخ ۔۔۔۔خان آتا دور آن درخانی مدرسہ 1883ء نا جوڑ مننگ اسکان،

مسٹمیکو بشخ  ۔۔۔۔درخانی مدرسہ نا جوڑ مننگ آن پاکستان نا  جوڑمننگ1947ء اسکان

 چارمیکو دور نا بناء ئِ 1947ء آن تا اینو نا دے اسکان (1)سرپند مننگ اِک۔

بڑزکو سترآتیٹی پوسکنا شاعری نا تعین ئِ۔1947ء تون گنڈنگا ولے داڑے ہم باز آ سوال آک مدام ملاس سلیرہ کہ اگہ اسہ ملک ئسے نا پوسکن جوڑ مننگ یا پین ملک ئسے آن جتا مننگ نا دے ئِ سوب جوڑ کرسہ براہوئی پوسکنا ادب و شاعری نا بناء ناذریعہ, خیال کننگ اِک۔ ہراٹی ہچو دلیل ئس دو بفک انتئے کہ دا ہیت کل آ پاش و درشان ئِ کہ نن براہوئی زبان و ادب نا بارواٹ ہیت کننگ اُن و دا ہمو قوم و نسل نا زبان و ادب ئِ ہرا ہمو راج نا ودی مروکے یا ہمو قوم نا پجار ئِ ہرا، پاکستان نا جوڑ مننگ آن مسہ نیم سد سال مست دا ڈغار آ آباد اسُر و حکمرانی کرسہ بننگو۔

واہم اگہ ادب ٹی جدّت یا جدیدیت نا ہیت نا سوال ئِ  کبلئی یا اردو ادب نا بابت جدیدیت اسہ ادبی او تحریک اس گدرینگانے۔ براہوئی ادب ٹی دا تحریک نا ہچو ڈس اس متنے۔ ولے ہراڑے متکنا روایت آن پد پوسکنو روایت اسے نا بنداو نا ہیت اے تو براہوئی ادب نا بابت اٹ خیال، فکر و سوچ آتیٹی تبدیلی نا ہمو محرکات آتے پٹنگ ئِ ہرانا سوب آن، متکنا سوچ و خیال آتا ہند ئِ پوسکنو خیال و سوچ آک ہلیرہ۔

خیال و سوچ آتیٹی تبدیلی و پوسکنی نا بابت ہم براہوئی پوسکنا ادب نا بنا ئِ 1947ء آن کننگک دنکہ، ڈاکٹرحمید شاہوانی تینا پی ایچ ڈی نا مقالہ ٹی براہوئی جدید ادب نا بارواٹ دن نوشتہ کیک۔

آن گڈ نا دور ئِ براہوئی پوسکنا ادب نا روشن آ دور پاننگ کینہ انتئے کہ براہوئی ادب ٹی جدیدیت نا رجحان, رویہ غاتیٹی ترقی پسندیت و تبدیلی نا بناء مریک دا دور ٹی باز جتا جتا فکر و گشاد نا علمی و ادبی گل آک جوڑ کننگار‘‘(2)۔

داہم مننگ کیک کہ ڈاکٹر حمید شاہوانی، ڈاکٹر عبدالرحمن براہوئی نا ہمو مقالہ غان بڑزکو خیال آتے اخذ کرینے ہرا بلسم رنگ ٹی، براہوئی ادب نا سرحال آ نوشتہ ئِ۔ اونا ہمو پیراگراف آن گڑاس ستر داڑے نوشتہ کینہ ہرافتیٹی براہوئی پوسکنا ادب نا بناء ئِ 1947 آن پد پاننگک دنکہ۔

’’پاکستان جوڑ مننگ آن پد نا دور ئِ نن پوسکنا دور پانہ دا دور ٹی براہوئیک انگریزی، اردو تعلیم حاصل کریر او ہندا سوب ئِ کہ اوفک براہوئی ادب ٹی پوسکنا خیالاتے کن کسراس ملار، 1957ء ٹی براہوئی افسانہ، ڈرامہ نوشتہ کننگ شروع مس ہراتم ریڈیو، ٹیلی ویژن بسُرتو داڑاٹ براہوئی زبان و ادب ئِ شون رسینگا‘‘(3)۔

بڑزکو ہڑتوما اقتباساک اسہ وڑ ئُ کہ قیام پاکستان آن گڈ، خیال آتیٹی تبدیلی بس، ہرانا سوب آن، قدیم شاعری یا قدیم و متکنا خیال آتیٹی پوسکنی برسہ کرے۔ ولے ڈاکٹر عبدالرحمن براہوئی، ارا پوسکنو ہیت کرینے اسٹ داکہ،’’دا دور ٹی براہوئیک، انگریزی اردو تعلیم حاصل کریر،، یعنی او مذہبی یا ملائی خواننگ نا ہندا، انگریزی و اردو تعلیم نا بناء نا پائک ہرا اونا نزداٹ اسہ تبدیلی ئسے۔ ایلو دا ہیت کہ ’’ہراتم ریڈیو، ٹیلی ویژن بسُرتو داڑان براہوئی زبان و ادب ئِ شون رسینگا‘‘

ڈاکٹرعبدالرحمن براہوئی نا دا خیال آن واقعی حقیقت نا گند بریک انتئے کہ، زبان ئسیٹی تبدیلی و انقلاب نا سوب، میڈیم مریک اے میڈیم، پرنٹ میڈیا نا رداٹ مرے یا الیکٹرانک میڈیا نا پنٹ چائنگے۔

ہندا دور یعنی 1956ء ٹی ریڈیو پاکستان کوئٹہ سینٹر نا بندائو تخنگا، اسہ سال ئسے آن گڈ یعنی 1957ء ٹی کوئٹہ سینٹر آن براہوئی پروگرام آتا بناء مس۔ ہراڑان، براہوئی زبان و ادب ٹی شون حالی نا کسر ئس ملنگا یا ریڈیو ٹی براہوئی پروگرام آتا بناء آن براہوئی پوسکنا ادب نا دریچہ ملنگا۔ انتئے کہ ہمو وخت ریڈیو ٹی بیرہ پنچ منٹ براہوئی پروگرام آتیکن اسک ہرا 18مئی 1961ء ٹی پنچ منٹ آن ودیسہ پانزدہ منٹ کننگا یعنی ہمو وخت ہفتہ ٹی براہوئی نا بیرہ مُسہ شعر شینک کننگارہ(4)او وخت آ ہم براہوئی شعرآتا انائونسمنٹ اردو ٹی کننگاکہ ہندن،25دسمبر1963آن براہوئی پروگراماک ہڑدے شام نا شش بجہ ئُ پنچ منٹ آن  تا شش بجہ ئُ بیست منٹ اسکان شینک مننگ بناء کریر ہرافتا انائونسمنٹ بلوچی ٹی کننگاکہ۔

داڑان سماتمک کہ 1964ء اسکان بیرہ بیست منٹ براہوئی پروگرام آتیکن اسکہ ہرا اسہ ہندنو زبان ئسیکن باز مچٹ اسکہ ہرا مچا بلوچستان ٹی تالان ئِ۔

دا دور ٹی ریڈیوتون اواراوار،گڑاس اخبارآتا بناء ہم مس دنکہ، 1950 ٹی مولانا عبدالباقی درخانی نا توئی معلم, کوئٹہ غان شینک مننگ بناء کرے ہرا اردو ٹی اسکہ ولے اونا گڈیکو پنہ غاتیا براہوئی و بلوچی نا نوشت آک چھاپ مسرہ۔

ہندا سال 1950ء ٹی توئی’’مبلغ‘‘ ہم اردو ٹی کوئٹہ غان مولانا عبدالغفور درخانی نا ادارت اٹ شینک مسکہ ولے دا سما افک کہ داٹی براہوئی و بلوچی نا بشخ اسک یا الوّ؟۔

ہندن1960ء ٹی پانزدہ دے ئی ’’ایلم‘‘ مستونگ آن نورمحمد پروانہ نا ادارت اٹ شینک مننگ نا بناء کرے ہرا براہوئی زبان ٹی اسک و اوٹی کزاں کزاں اردو نا نوشت ہم اوار کننگاکہ یعنی، 1960ء آن باقاعدہ وڑاٹ اخباری بابت براہوئی زبان ٹی شون نا چوہائو ئس خننگا۔

بڑزکو دلائل آتا زی آ دا ہیت کننگ کینہ کہ 1960ء و داکان گڈ براہوئی پوسکنا ادب و شاعری نا بناء مریک، انتئے کہ ریڈیو نا بناء یا گڑاس اخبار و رسالہ غاتا اجراء آن براہوئی زبان و اونا ادب ئِ لس خلکت اسکان رسینگنگ نا کمک ملیک۔